PALESTINA E MBËSHTETË FUQISHËM INTEGRITETIN TERRITORIAL TË SERBISË

13, Jan, 2019 | POLITIKA NDËRKOMBËTARE

Ambasadori palestinez në Beograd, Mohamed K.M. Nabhan, në një takim që zhvilloi me studentët e Universitetit të Beogradit ripërsëriti qëndrimin e autoriteteve që përfaqëson, duke thënë se Palestina dhe kombi palestinez gjithmonë do jenë krah Serbisë.

“Miqësia e madhe e popullit tonë me Serbinë daton që nga koha e Shën Savës, prandaj, të nderuar studentë të Universitetit të Beogradit, e sigurojmë popullin serb, se autoritetet e shtetit të Palestinës do kërkojnë nga të gjitha vendet arabe të rishqyrtojnë njohjen e Kosovës. Do kërkojmë, që këto vende ta respektojnë integritetin territorial dhe sovranitetin shtetëror të Serbisë. Diplomatët tanë, admirues të qëndresës së popullit tuaj, janë duke punuar tashmë me zell, që më në fund, opinioni arab ta kuptojë se Kosova dhe Palestina janë dy probleme të ndryshme. Ashtu siç Palestina është shtet i pushtuar nga Izraeli, ashtu edhe Kosova si krahinë e Serbisë, është e pushtuar nga shqiptarët. Historia na mëson, se pushtimin e Palestinës dhe Kosovës i nxiti lobi cionist në Washington. Edhe ky fakt i dhimbshëm i bashkon popujt tanë. Përmes studentëve dhe kanaleve tjera, autoritetet palestineze janë duke i informuar të gjitha universitetet arabe me realitetin e Kosovës. Atje referojmë për jetën nën pushtim, për shpërnguljen e dhunshme të palestinezëve dhe serbëve nga vendlindjet e tyre, për procesin e kolonizimit dhe për qëndresën e përbashkët ndaj këtyre fatkeqësive.”, -tha ndër të tjera ambasadori palestinez, duke nxitur reagimin pozitiv të studentëve të Universitetit të Beogradit.