LUFTOJMË PËR SHQIPNI TË SHQIPTARËVE

Nga qyteti i Ohrit, aty ku Zoran Zaev mirëpriti liderët e aleancës së re të “islamit dhe ortodoksisë politike ballkanike”, BE-ja mori mesazhin e qartë, përmes të cilit nënkuptohet se projektet e mëdha në këtë pjesë të Europës, mund të bëhen edhe pa BE-në. Që mesazhi të jetë domethënës dhe alternativbërës, u kujdesën vet protagonistët. Rama, Vuçiç dhe Zaev, ia bënë të qartë BE-së, se projekti për Unionin Ballkanik mund të implementohet edhe në rastin kur anashkalohet tërësisht interesi kombëtar i shqiptarëve. Ky mesazh shqetësues për gjeopolitikën, përveçse goditje e rëndë për interesat e nacionalizmit shqiptar, godet rrufeshëm edhe interesat e kryeqendrave të mëdha të kontinentit tonë, siç janë Brukseli, Berlini, Londra dhe Roma. Të mos harrojmë se mbështetja disavjeçare e Presidentëve Putin dhe Erdogan për liderët aktual të Shqipërisë, Serbisë dhe Maqedonisë së Veriut, jo vetëm se ndikoi, por edhe ndihmoi që të riaktulizohet suksesshëm projekti i vjetër për ndarjen e sferave të interesit politik, ekonomik, ideologjik dhe fetar. Andaj, nuk është për t’u habitur që ky projekt ka siguruar edhe mbështetjen e disa vendeve të BE-së, e sidomos mbështetjen e Francës, e cila, në momentin aktual po e luan rolin e saj kryesorë.

Zhvillimet e pafavorshme për interesin tonë kombëtar dhe sidomos për Kosovën e rrethuar në të katër anët, dëshmojnë se elita politike e shqiptarëve ndodhet në krizë të thellë. Kjo krizë e elitës politike e ka zanafillën dhe arsyen e saj. Një kohë të gjatë, elita politike shqiptare ka hezituar të përballet me realitetin e instrumentalizimit të besimit fetar dhe me realitetin e zymtë të indoktrinimit ideologjik në politikën kombëtare. Tani, elitës politike shqiptare po i ofrohet rasti të bindet, të dorëzohet dhe të kapitulojë pa e shkrepur asnjë “plumb”. Pse? – Sepse pjesa më e madhe e elitës politike me aftësi vendimmarrëse përbëhet nga drejtuesit e subjekteve të kapura e të instrumentalizuara. Pra, te elita politike është praktikuar me sukses e njëjta metodë instrumentalizimi sikurse te bashkësitë fetare islame dhe ortodokse.

Shpresojmë se pas disa muajve, e ndoshta edhe para zgjedhjeve në Serbi, për projektin e Unionit Ballkanik do të kristalizohet edhe qëndrimi i prerë i Administratës së Sheteteve të Bashkuara. Në rast se SHBA-të e mbështesin projektin për themelimin e një unioni të tillë ballkanik, atëherë, në Kosovë dhe Shqipëri, si shpresë e vetme që simbolizon vazhdimësinë e luftës politike për Shqipni Europiane, për Shqipni të Shqiptarëve, për një Shqipni të lirë, të bashkueme dhe demokratike, do të mbetet Katedralja “Nënë Tereza” në Prishtinë.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *