POLITIKA KOMBËTARE

SENATORI ITALIAN: BASHKOHEMI NË PROTESTË KUNDËR DIKTATURËS

SHKRUAR NGA A. SHAHINI

Senatori italian, Lucio Malan ishte në sheshin e lirisë mbrëmjen e djeshme, pak orë para protestës popullore që pritet të mbahet sot, nga ku përcolli mesazhin e mbështetjes së fuqishme për kauzën e opozitës dhe shqiptarëve për zgjedhje të lira dhe të ndershme. Ai e cilësoi si jetike betejën opozitare për votën e lirë, ndërsa kujtoi se është pikërisht vota e lirë që ndan kufirin mes demokracisë dhe diktaturës.

Në diktaturë njerëzit nuk votojnë të lirë. Ndaj dhe ai tha se janë pikërisht rregullat e demokracisë për të votuar të lirë, pa dhunë, kërcënime e shitblerje të kësaj të drejte që sot me të drejtë kanë ngritur shqiptarët në protestë. Duke i cilësuar jo të lira zgjedhjet që zhvillohen në kushtet kur vota vidhet apo blihet, senatori italian tha se rezultati i prodhuar nga zgjedhjet nuk mund të pranohet.

“Ndryshimi mes demokracisë dhe diktaturës nuk është se në demokraci votohet dhe në diktaturë jo. Por ndryshimi është se në demokraci merret vesh fituesi pas mbajtjes së zgjedhjeve, ndërsa në diktaturë fituesi dihet para zgjedhjeve dhe është kjo ajo që po tentojnë të bëjnë këtu. Duhet të ketë rregulla të qarta. Duhet të ketë rregulla që nuk lejojnë mashtrimet, shitblerjen e votës, që nuk lejojnë marrjen e votës me dhunë apo kërcënime. Është kjo është ajo për të cilën ju po luftoni. Zgjedhjet nuk mund të pranohen nëse nuk janë të lira sepse nëse pranohen atëherë rezultati mbetet dhe ata do të thonë se kanë mbështetjen e pjesës më të madhe të popullsisë dhe kur kjo nuk është e vërtetë. Të maten me armë të njëjta, jo duke i lidhur duart pas kurrizit kundërshtarit. Le të hyjnë në garë të barabartë”, u shpreh senatori italian.

Senatori Malan shprehu vlerësimin e tij për rolin e rëndësishëm të kreut të PD, Lulzim Basha në betejën për demokracinë në Shqipëri, ndërsa vlerësoi gjithashtu qëndresën paqësore të opozitës dhe gjithë shqiptarëve në këto 84 ditë protestë për të drejtën themelore të votës së lirë. “Unë besoj se jo vetëm të gjithë shqiptarët duhet t’ju jenë mirënjohës juve që jeni këtu, por të gjithë europianët. Sepse ju po luftoni për lirinë, për lirinë e gjithkujt, lirinë e Shqipërisë, lirinë e familjeve tuaja dhe gjithë Europës. Ne italianët, që jemi kaq afër me Shqipërinë, jemi afër jo vetëm nga pozicioni gjeografik, por jemi afër me zemër, jemi afër sepse shumë prej jush janë në Itali dhe njihemi mirë mes njëri-tjetrit. Duhet të dëgjojmë veçanërisht fort solidaritetin dhe miqësinë ndaj jush dhe mirënjohje për atë që po bëni. Të luftoni për zgjedhje të lira është thelbësore, tepër e rëndësishme. Unë i them një faleminderit shumë të madhe për Lulzim Bashën dhe ju që e mbështesni, dhe të gjithë ata që punojnë çdo ditë për këtë gjë. Një njeri i çmuar për popullin e tij, sepse mund të ishte duke u marrë me shumë gjëra të tjera, ashtu si edhe ju, por në fakt jeni këtu sepse e dini se këtu është në lojë e ardhmja juaj, e ardhmja e familjeve tuaja, e fëmijëve tuaj dhe gjithë Shqipërisë e Europës”, u shpreh senatori italian.

Forza Italia mbështetje kauzës së opozitës për zgjedhje të lira

Forza Italia, një nga partitë më të pushtetshme në Itali, ka shprehur dje mbështetjen e fuqishme ndaj kauzës së opozitës dhe shqiptarëve për zgjedhje të lira dhe të ndershme. Senatori italian, Malan shprehu mirënjohjen për kontributin e çmuar të kreut të PD, Basha në përpjekjet e mëdha për ndërtimin e të ardhmes së shqiptarëve në një Shqipëri europiane.

“Keni punuar për 12 javë dhe jeni heronj! Unë nuk e di sa të tjerë do të ishin kaq konsistentë, kurajozë dhe të fortë për të rezistuar kaq gjatë. Në shumë shtete ku liria është paguar shtrenjtë, edhe pse shumë kohë më parë, do të ishte e vështirë të gjeje njerëz si ju dhe si Lulzim Basha që rezistojnë kaq gjatë për lirinë. Nesër më thonë se do të jetë manifestimi më i madh se kurrë në Shqipëri. Do të jetë një ditë e rëndësishme për ju sidomos që jeni këtu. Ju duhet të bëheni shembulli për shumë të tjerë që do të vijnë. Kundërshtarët tuaj, kundërshtarët tanë do të shpresojnë në ndonjë incident apo akt të gabuar. Nuk duhet bërë kjo, duhet ndaluar. Forca juaj, forca jonë është të rrijmë në anën e së drejtës, anën e lirisë dhe së vërtetës. Atëherë unë kur të kthehem do të kërkoj ndihmën më të madhe të mundshme të Forza Italia-s për kauzën tuaj.

Ju e dini se eksponentë të tjerë të Forza Italia-s kanë ardhur këtu për të dhënë për ju dhe zotin Basha solidaritetin e tyre. Të tjerë do të vijnë dhe do të kërkojmë vëmendjen e organizmave ndërkombëtare dhe qeverisë italiane. Sepse liria është ngjitëse, kalon nga shteti në shtet, por edhe diktatura mund ta bëjë këtë. Dhe lufta që bëni për dekriminalizimin e politikës, Parlamentit dhe organeve shtetërore është thelbësore për të gjithë Europën. Një vend i rëndësishëm, anëtar i NATO-s, aspirant për në Bashkimin Europian nuk mund të ketë kriminelë që dominojnë jetën politike. Atëherë e përmbyll duke thënë faleminderit për betejën tuaj, betejën tonë. Të gjithë ju meritoni mbështetjen, vëmendjen e italianëve, europianëve dhe natyrisht gjithë shqiptarëve. Dhe mirënjohjen për Lulzim Bashën sepse është një vlerë e shtuar për Shqipërinë dhe Europën dhe shpresoj të vijë për vizitë të na mbështesë edhe ne në Itali. Faleminderit atij që lufton për lirinë dhe ju që e mbështesni”, u shpreh senatori italian.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *