POLITIKA KOMBËTARE

Nga frika se mos pëson fundin, Rama propozon mbylljen portaleve gjatë fushatës

Të gjitha portalet elektronike që nuk janë të regjistruara dhe nuk njihen nga bordi i monitorimit të mediave, nuk do lejohen të bëjnë fushatë elektorale.

Ato do të mbyllen nga shteti nëse bëjnë propagandë elektorale gjatë 1 mujorshit të fushatës.

Ky është një ndër propozimet e Partisë Socialiste dorëzuar në komisionin e reformës zgjedhore , në një tentativë për të disiplinuar portalet të cilat fshihen pas anonimatit, jo rrallë duke abuzuar, raporton “Report TV”.

“Ndalohet përdorimi i portaleve elektronike të pakontrolluara nga Bordi i Monitorimit të Mediave për propagandë zgjedhore. Autoritet shtetërore marrin masa për mbylljen gjatë fushatës zgjedhore të portaleve elektronike të paregjistruara të cilat përhapin propagandë zgjedhore, zhvillojnë sondazhe pa respektuar rregullat e këtij kodi, apo kalojnë kufirin e informimit dhe konsiderohen propagandë zgjedhore”, thuhet në nenin 10 të amendamenteve të dorëzuara nga bashkëkryetari i komisionit të reformës Taulant Balla.

Sipas këtyre ndryshimeve që pritet të shqyrtohen në ditët në vijim, drejtuesi lokal cakton 3 muaj para zgjedhjeve vendet ku do afishohen posterat elektoralë.

Hapësira për secilin subjekt varet nga votat që ka marrë në zgjedhjet e kaluara.

Posterat elektoralë nuk duhet të jenë më të mëdhenj se 50 me 50 cm, ndërsa flamujt nuk duhet të vendosen më larg se 10 metra nga zyrat e partive.

Ndalohet gjithashtu stampimi i imazhit kandidatëve ose partive te shkrepëset.

“Ndalohet prodhimi dhe shpërndarja e shkrepësve, çakmakëve, apo mjeteve të ngjashme ndezëse për propagandë elektorale”, thuhet në nenin 11 ku saktësohen cilat janë materialet propagandistike të ndaluara.

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *